《讀者投稿》
你好, 我係一個新手媽媽, BB已經半歲大, 婚後同奶奶分開住, 一直都無咩問題, 但自從BB來了, 婆媳大戰就開始, 我相信呢度會同好多讀者有共鳴, 想係度表達同分享一下自從懷孕後當中嘅婆媳矛盾。
當我有左BB, 奶奶就已經好決絕咁同隊友講唔可以請陪月, 佢會讀10日嘅陪月興趣班, 之後幫我坐月, 而且我要當聘請佢做陪月咁, 比兩萬幾佢 (而我唔可以要求佢做陪月職責內嘅事情, 佢要自由發揮), 最後因為呢件事我變得日喊夜喊, 隊友係個超級媽寶, 仲同我講叫我放心, 奶奶會好好照顧我同BB, 大前提係連隊友都唔係奶奶湊大, 又唔識煮飯, 奶奶完全無湊B經驗, 我點會放心...惡夢就係生產後開始...
我經歷10級痛楚將BB生落嚟, 人都未回氣, 老爺奶奶就嚟到醫院, 你以為佢會關心我? 會準備炒米茶? 想多了, 佢地只係兩手空空咁嚟睇BB, 而且仲唔會消毒雙手, 仲拉低口罩係咁對住BB講野, 當我問隊友說好的陪月呢? 隊友就同奶奶反映, 奶奶下次嚟探訪時, 仍然無炒米茶, 佢亦只係就買左盒地鐵站 x 記點心嘅豉椒排骨飯比我...作為母乳媽媽, 大家好清楚豆豉會退奶, 而奶奶回應我, 退奶飲水就無事, 而且唔支持我餵母乳, 退奶就由佢退, 當時我仲係張病床上面, 聽到佢咁講真係人都癲, 最後都唔再指望佢會幫我陪月, 唯有自己搵有湊孫經驗嘅老人家朋友嚟救命。
有時真係識人好過識字, 朋友好快就幫我準備炒米茶外, 仲幫我發定啲海參放雪櫃備用同煲上奶湯比我, 我終於覺得人間有愛。
點知....奶奶上到嚟我屋企, 我以為自己比人打劫, 佢唔會準備月子餐/薑水等等坐月嘅需要比我都算, 仲攞走晒朋友準備好嘅海參返佢自己屋企, 自始我就無再見過啲海參, 而且又會係我親餵緊BB嘅時候係咁拍我房門要我比BB佢玩, 上到我屋企就好似大爺咁抱住BB坐係梳化, 郁都唔郁。坊間話月中媽媽唔好掂生水?? 因為隊友只有一星期放假陪我坐月, 之後嘅日子洗奶樽同家務都只有我自己落手做, 自問自己係用意志力嚟坐月。
後來隊友都覺得唔對路, 就叫奶奶真係落手煮啲月子餐比我食, 唔好再買飯盒, 奶奶嘅月子餐大慨只有4種食物: 白烚豬肉+烚菜芯+街市預先醃好用嚟BBQ嘅雞翼+一壺清如水嘅湯, 而隊友覺得一啲問題都無。
講到呢度, 我都只係慨嘆自己嫁之前無查清楚隊友嘅底細, 到底隊友有幾愛佢呀媽??
坐月之後仍有<媳婦不能離開房間>嘅故事, 如果可以, 希望再同大家分享。
＃我的極品四大長老
Search